Taarifa kutoka kwa viongozi wa vyama 10 vya siasa vya upinzani

Viongozi wa vyama 10 vya siasa vya upinzani wamesisitiza bado kuna umuhimu wa kuendelea na mchakato wa Katiba mpya itakayokuwa na misingi bora ya uongozi, kulinda rasilimali za nchi na nidhamu kwa viongozi.

Wamesema Katiba iliyopo ina upungufu na ilitengenezwa na watu wachache lakini mchakato wa upatikanaji wa Katiba mpya chini ya Jaji Joseph Warioba  uliwashirikishwa Watanzania wengi.

Vyama hivyo ni AFP, Chaumma, NCCR-Mageuzi, ADC, TLP, NLD, UPDP, SAU, Demokrasia Makini na DP.

Viongozi wa vyama hivyo wameeleza hayo leo Jumanne Novemba 28, 2017 katika majadiliano kuhusu mchakato wa Katiba mpya yaliyoandaliwa na Kituo cha Sheria na Haki za Binadamu (LHRC).

Naibu Katibu Mkuu wa TLP, Richard Lyimo amesema kwa hali ilivyo sasa hakuna ubishi kwamba Katiba mpya bado ina umuhimu na itamsaidia Rais John Magufuli kutekeleza  majukumu yake kwa ufanisi.

"Rais Magufuli anafanya kazi nzuri na tunazitambua juhudi zake, lakini tunahitaji Katiba mpya ili Rais akiondoka na mwingine kuchukua madaraka ayaendeleze katika misingi bora iliyopo kwenye Katiba," amesema Lyimo.

Katibu Mkuu wa SAU, Johnson Mwangosi ameungana na Lyimo akisema Katiba mpya ni lazima kwa masilahi na mustakabali wa Taifa.

Hata hivyo, akijibu swali bungeni hivi karibuni Waziri Mkuu, Kassim Majaliwa alisema Serikali inatambua mchakato wa Katiba mpya lakini kwa sasa kipaumbele chake ni kuwapa wananchi huduma za jamii.

Awali, akifungua mjadala huo, Kaimu Mkurugenzi Mtendaji wa LHRC, Anna Henga amesema lengo la kuuandaa ni kupata maoni kutoka kwa vyama vya siasa na hasa baada ya mchakato huo kukwama.

Mwaka 2014, Bunge Maalumu la Katiba lilivunjwa baada ya kumalizika kwa kupata Katiba iliyopendekezwa na kilichobaki ni wananchi kupiga kura ya maoni ili kupata Katiba mpya.